الجمعة، 23 يونيو، 2017

ملاحظات ما بعد حلاقة (الزيرو)

على هامش ما بعد 10 أيام، من حلاقة الزيرو:
- مبدئيًا، كنت متصور إني ممكن أحلقها في البيت عادي، من منطلق (إيه اللي ممكن أقلق منه؟ هل إن يكون جانب من الشعر أعلى من الجنب التاني؟ المفترض يعني إني هـ سفلت دماغي كلها، يبقى أخاف من ايه؟).
- للأسف، اكتشفت إني كنت غلطان، لأني كنت بستعمل ماكينة يدوية (مش كهربا)، نجحت في إزالة الشعر تمامًا عن تلت دماغي الأمامي، وفشلت في البقية، (مش قادر أقولكم المنظر كان مسخرة إزاي.. تخيلوا إنتم!!)، والكارثة إن كنت نوبتجي في المستشفى يومها، فحاولت ألحق أعدى على حلاق في الطريق سريعًا، بعد ما غطيت دماغي بأي حاجة، فلقيت وشاح أحمر في أبيض (الفلسطيني الشهير).
- الأدهى، إن اللي يشوفني، يعرف إني وقور وأكبر من سني، فهيستغرب من منظر لف الوشاح، وليه قررت -فجأة- أقلد منظر (أحمد السقا) في (شورت وفانيلا وكاب)، مش هيعرف كم الفضيحة اللى تحت العمامة، كان عندي هاجس -طول الطريق- إن الهوا يوقعها فجأة، أو صديق هزر معايا فيشدها!!
- أكيد اخترت حلاق برة القرية طبعًا، لأن لو معملتش كدا، هيفضلوا يتندروا ويتناقلوا اللي حصل، ويذلوا بيه أبنائي وأحفاد أبنائي.
- الحلاق اللى رحلته، كان مصر يتابع التلفزيون، أثناء شغله بالموس على جمجمتي، فطلبت منه يركز في شغله.
- أصلك ممكن تسرح مع المسلسل، فتبوظ شعري، أو تحف جانب منه، فيبقى أعلى من الجنب التاني. 8-) :D
- كان في مخيلتي يعني، إن الحلاقة الزيرو بتستمر زي البلاطة، لمدة أسبوعين مثلًا، قبل نمو الشعر من جديد، لكن اتفاجئت إنه ابتدى ينبت في خلال 4 أيام مباشرة.
سؤال فلسفي وجودي:
- طب إزاي (حسام حسن) و(زيدان)، قادرين يحافظوا على البلاطة طول الوقت؟؟ هل معقولة بيحلقوا بالموس كل 3 أيام؟
في الحالة دي، يبقى شابوو بجد على الصبر وطولة البال!!
- فيه ناس عندها لازمة عصبية، بأنها لما تفكر بعمق أو تتوتر، بتمرر صوابعها بين شعرها.
أنا منهم للأسف.. فكان عندي مشكلة، إني كل لما أسرح بايدي -كالعادة- على ارتفاع 5 سنتمتر من فروة دماغى، أتصدم إن فيه فرااااااغ..
دا العيب الوحيد تقريبًا، لكن في المقابل، منكرش إن الزيرو بتدي احساس عارم بالتحرر (خصوصًا في الصيف)، كإنه ميلاد جديد، أظن إن اللي اتولدوا بنات، جديرين بأنهم يحسدونا عليه.
(باستثناء ديمي مور وفردوس عبد الحميد، بما إنهم تجرأوا وحلقها فعلًا).

ليست هناك تعليقات:

إرسال تعليق

المشاركات الشائعة

"