الخميس، 9 يونيو 2016

أول مقابلة/ مزاولة شخصية أخوضها بالإنجليزية

تمت المقابلة صباح الخميس 9 يونيو، ولو أن هناك دروس مستفادة، فإننى أستطيع أن أوجزها فى الآتى:
- محاولش فى المرات الجاية أعتمد على تقمص الأفلام الأجنبية كمصدر للغة، بلاش أندمج خالص؛ لأنى مع أول سؤال سؤال مش مفهوم، ممكن كنت على شفأ أتعصب وألقى نفسى بقول (وات إز فكين كويتنشس)، ولا لما الآنسة الكيوت قالت فى الآخر (باى باى)
بطريقة مرحة، الرد اللى جت فى بالى بطبيعة الحال (باى باى هانى، تيك كير، بيبى).
- بلاش خالص أجيب سيرة (لأبعد مدى)، لأن هيسألونى هيا عبارة عن ايه، وهنا حصيلتى فى الإنجليزى مش هتسعفنى أشرح، أصلًا أنا بنطق كلمة (literary initiative) بالعافية، تكرار R و T بيخلينى أظهر زى الأهتم لما أقولهم، أعتقد فى المرات الجاية بفكر أحذف أمها من السيرة الذاتية أصلًا.
- كلمة السر دايمًا "احترم قدراتك، هتحترمك"، يعنى يدوب إنت بتسد فى الجمل القصيرة المباشرة، لكن لسه أوى لما أكون مؤهل تدى محاضرات فى Ted، فليه تتفلسف وتخلى العملية تبهوأ منك.
- مفيش شئ سيئ فى المطلق، يعنى فى البداية كنت زعلان إنى صحيت عندى زكام، وهدخل مقابلة رسمية وأنا مش فى كامل السيطرة على مناخيرى، لكن بعد الانترفيو اكتشفت جانب طيب فى الموضوع، كدا كدا كنت هترفض فى الأغلب، فتخيل لما تبقى أهو خدت حقك مقدمًا؛ بأنك قرفتهم وأنت عمال تنف قدامهم فى المنديل كل شوية.
أيوة، نفس القرف اللى انت تخيلته لما قريت الجملة كدا.
بس سيبكم، الواحد استمتع استمتاع لامحدود، بغض النظر عن إنى غير مؤهل لسه للقبول فى برامج برة مصر "حتى الآن"، لكن مجرد مناكفتهم بالتقديم كل شوية، مخلينى منشكح بكم المزاولة اللى بسببها، لنفسى قبل ما يكون ليهم.

هناك 4 تعليقات:

  1. هههههههههههههه
    فكرتني بنفسي
    كان عندي انترفيو في جريدة ما يعني
    وكان عندي برد شنيع وفضلت قبل الانتر فيو اخد اي دوا عشان يخفف شوية من حدة العطس
    المهم انا اصلا كنت قلقانة وطبيعتي اني بكون في الاول ساكتة وبعدين بنفتح بالكلام
    كان كل شيء جميل وماشي بييييس خالص فجأة لما اتكلمت بسرعة كل حروفي دخلت ف بعضها وانا اصلا عندي مشكلة ف الراء والواو اللي ورا بعض هههه
    بس ماليش دعوة انا عايزة اللقاء صوت وصورة متحاولش

    ردحذف
    الردود
    1. ههههه الجميل فيكى يا رحاب إنك تلقائية وعلى طبيعتك، فمبتتأخريش فى مشاركة مواقفك المشابهة.
      إحنا كرجالة؛ عادى جدًا تكون مزكومين وحالتنا متبهدلة، لكن بحاول أتخيلك وأنتى فى نفس الحالة هههه مش قادر.
      نفسى كمان أسمعك فى حكاية الراء والواو دى.
      بعد كدا ممكن نتكلم فى رغبتك فى الحوار صوت وصورة.
      :D

      حذف
  2. هههههه
    مبتظهرش غير لما بتكلم بسرعة وبحاول اتخلص منها

    ردحذف
    الردود
    1. طب استنى لما نتقابل الأول يومًا ما، واسمعها منك، بعد كدا اتخلصى منها براحتك.
      ^^

      حذف

المشاركات الشائعة

"