الأحد، 4 أكتوبر، 2015

الأمير الأحمر

بمناسبة (عملية ميونخ).
عايزكم تركزوا قوى فى اللى انتم شايفينه فى الصورة.
الراجل دا أول مرة أقرا عنه كانت فى ثانوى، ومن ساعتها وأنا مبهور بيه، ومستغرب إزاى مكانش بيدرسوا شخصيته كقدوة وكفاءة ومثل أعلى.
الجدع دا كان أسطورة فى الجمع بين الشغل للدنيا والأخرة فى نفس الوقت.
جولدا مائير كانت مسمياه (الأمير الأحمر).
نظرًا لأنه من عائلة شديدة الثراء.
أما اسمه الحقيقى، فعلى حسن سلامة، ينسب لجمجمة الشاب الكيوت اللى قدامكم أنها خططت لعملية ميونخ، وعملية اختطاف الطائرة الإسرائيلية، إلخ، إلخ.
كانوا محتارين فى قدرته الخارقة على التخطيط العسكري، اللى تفوق على خريجى الكليات الأكاديمية
تولى أبو على جناح المخابرات فى منظمة فتح، وكان من أقرب المقربين لياسر عرفات، إزاى لا، وهوا مؤسس الجهاز العسكري المسمى (قوات ال 17 حرس الرئاسة)، أيوة، الشاب الرايق دا، مؤسس جهاز عسكرى كانوا بيصنفوه ضمن الأقوى بين أجهزة الأمن الفلسطينية.
حصل فى مرة أن ياسر عرفات أدى لطبيبة كيوت حق التجول فى الأراضى، زى مهيا عايزة، نظرًا للخدمات الجليلة اللى قدمتها للفلسطينين.
الطبيبة دى هى اللى عرفت فيما بعد بالجاسوسة (أمينة المفتى)، والسبب فى كشفها إن جنب ياسر عرفات، كان فيه تعلب محدش يعرف يشتغله اسمه (حسن سلامة).
كل اللى فات دا جميل، لكن فيه عدد كبير من المناضلين، اييه المميز وأبهرنى فى حسن سلامة بالذات؟
أبهرنى أسلوب حياته، إنه كان مقسمها بين نصفين متناقضين تمامًا:
- المناضل الداهية.
- الشاب اللى مقضيها.
حسن من عائلة شديدة الثراء، زى ما قلنا، فكان عايش وفى بقه معلقة دهب.
الراجل مقصرش إطلاقًا فى الواجب الوطنى، لكن دا ممنعهوش إنه يشهيص نفسه.
اتجوز مرتين.
ورغم حياته اللى يفرض عليها الحذر والسرية، لما فكر يتجوز المرة التانية كانت نفسه حلوة قوى، فراح شابك (روجينيا رزق).
مين (روجينا رزق)؟
حررتك دى اللبنانية الفائزة فى مسابقة (ملكة جمال الكون).
الله يرحمك يا حسن يا سلامة.
لو فيه نصيب لقدام، لازم قصة حياتك تتعمل فيلم.

هناك تعليقان (2):

  1. ههههههههههههههه
    ده انت عليك حاجات يا يس

    ردحذف
    الردود
    1. هههههه دا جزاتى إنى بجيبلكم قصص كلها مواعظ!

      حذف

المشاركات الشائعة

"