يمكن بس عشان فيه ناس كتير بتفهمنى غلط فى النقطة دى.
من أكتر القناعات اللى بتحكمنى فى الحياة، إنى بعتبر ربنا خلقنى لحكم عليا كتير، بس أكيد مش من بينها إنى أسبب إزعاج شخصى لحد.
لو الموضوع مهنى، وبيننا شغل والتزام، بيهدد مصالح ناس تانية، هتلقى بزعجك وأزعج اللى يتشددلك.
أما لو الموضوع مهنى وانتهاءه بيهدد مصالحى أنا بس، أو اللى بننا ارتباط شخصى فقط.
أول لما بحس إنى تقيل على قلب حد، هتلقانى ببساطة مش بس أخدت خطوة لورا، لا، الكورة الأرضية الحمد لله واسعة كتير، فببقى عايز أروح للطرف التانى من العالم.
والسبب ببساطة، إنى مبحبش أشوف أو احتك بحد تقيل على قلبى، ومن العدالة إنى أحقق للناس التانية، اللى اتمنى يحققهولى فى نفس الظرف.
أحيانا يكون قلت رأى لصديق فى رواية، وألقاه زعل، أو مش شرط، لو مجرد وصلنى إحساس ولو بالخطأ إنه زعل، بتبقى آخر مرة أقوله رأى فى شغل، يعنى أصل هنضايق بعض على اييه!
وبقى عادى، إن حد يسألنى (اقرا دى وقوللى رأيك)، فتلقانى أرد (أنت مش فاكر سنة (كذا) لما سألتنى عن رأيى، وكلامى معجبكش، يبقى خلاص، خلينا صحاب بعيد عن المواضيع الله يباركلك).
لو حد حسيت إنى تقلت أو فرضت نفسى عليه، بس كانت أخلاقه سمحة بحيث محذفنيش، أنا اللى بحذف نفسى من عنده عادى. :D
جايز الموضوع دا مبيبقاش مفهوم، طب يعنى أنت اللى غلطان، وأنت اللى كمان بتحذف، آه حضرتك، أصل مش مقبول بالنسبة ليا إن حد يعرفنى من قبيل كرم أخلاقه فى أنه بيستحملنى، طب وتستحملنى ليه، ما أنا أريحك خالص.
3:)
أحد أهم أمنياتى من حياتى القصيرة على الكوكب دا، إنى أكون أكتر ضيف خفيف على أهله على المستوى "الشخصى"، وإنى أكون مزعج ومشاغب كأقصى ما تكون المشاغبة على المستوى "المهنى".
ليست هناك تعليقات:
إرسال تعليق